एजेन्सी- जर्मनी, स्पेन र ब्राजिललगायतका विभिन्न १८ मुलुकबाट आयात गरिने ‘एल्युमिनियम’ मा अमेरिकाले थप कर बढाएको छ ।

एल्मुनियम फोहोर थुपार्ने स्थलका रूपमा प्रयोग भएको आरोप लगाउँदै त्यसमाथि नयाँ कर लगाउने घोषणा ट्रम्प प्रशासनले शुक्रबार गरेको हो ।

अमेरिकी वाणिज्यमन्त्री विल्बर रसले ‘एल्युमिनियम शीट’ आयात बढ्दा अमेरिकी घरेलु उत्पादकहरूलाई कमजोर बनाउन सक्ने बताए  ।

‘यो धेरै नै जटिल कार्य हो तर बजारीकरणका सञ्जालले अमेरिकामा धेरै अनावश्यक सामानहरू थुप्रिन्छन् र हामीले यसैलाई व्यवस्थित गर्दैछौं,’ उनले भने ।

अमेरिकाको पछिल्लो निर्णयले जर्मनी र ब्राजिलबाट आयात हुने एल्युमिनियममा क्रमशः ३६३ प्रतिशत र १३७ प्रतिशत कर वृद्धि हुनेछ ।

अमेरिकाले गत वर्ष जर्मनीबाट २८ करोड ७० लाख अमेरिकी डलर र ब्राजिलबाट नौ करोड ७० लाख अमेरिकी डलर बराबरको एल्युमिनियम खरिद गरेको थियो ।

अमेरिकाको यो (प्रारम्भिक) निर्णय भए पनि अमेरिकी बाणिज्य विभागले कर वृद्धि तत्कालै कार्यान्वयनमा आउने बताए ।