तनहुँ– कोरोना भाइरसको संक्रमण रोक्न जारी गरिएको लकडाउन प्रभावितका लागि तनहुँको एक स्थानीय तहले वितरण गरेको राहतको चामल सडेको र ढुसी परेको भेटिएको छ ।

बन्दीपुर गाउँपालिका वडा नं ५ ले कल्चोक क्षेत्रका केही घरपरिवारलाई वितरण गरेको चामल ढुसीयुक्त छ । चामलको रङ कालो भएको र अमिलो गन्ध आएको राहत पाउने स्थानीयवासीले बताएका छन् ।

चामल ३–४ पटक पखाल्दा पनि कालो नगएको तथा पकाएर खाँदा स्वादै अर्कै आएकाले कुखुरा र सुँगुरलाई कुँडो बनाएर खुवाउन थालिएको स्थानीयवासी रेशम विकले बताए । गाउँपालिकाका अध्यक्ष पूर्णसिंह थापाले राहत वितरणका लागि वडालाई नै जिम्मा लगाइएको जानकारी दिँदै लापरवाही गर्नेलाई कारवाही गरिने बताए ।

वडाध्यक्ष ध्रुवप्रसाद लामिछानेले भने सो क्षेत्रमा राहत वितरण गर्न जिम्मेवारी वडा सदस्यलाई दिइएकाले चामल कस्तो पर्‍यो भन्ने आफूले थाहा नभएको बताए । थोक बिक्रिताको कारण सडेको चामल बिक्री भएको पाइए थोक बिक्रेतालाई कारवाही गरिने उनको भनाइ छ ।

वडाध्यक्षा लामिछानेले  उक्त चामल फिर्ता गरी शुक्रबार अर्को वितरण गर्न लागिएको छ ।