भक्तपुर- आज साँझबाट सुरु हुने भक्तपुरको विश्व प्रसिद्ध ऐतिहासिक बिस्केट जात्रा कोरोना भाइरसको संक्रमणलाई मध्यनजर गर्दै औपचारिक पूजामा मात्र सीमित हुने भएको छ ।

विश्वव्यापी महामारीको रुपमा फैलिरहेको (कोभिड–१९) कोरोना भाइरस संक्रमणलाई मध्यनजर गर्दै भक्तपुर नगरपालिकाले जात्रासँग सम्बन्धित सम्पूर्ण सरोकारवालासँग छलफल गरेर यस वर्ष बिस्केट जात्रालाई औपचारिक पूजामा सीमित गर्ने निर्णय गरेको हो ।

भक्तपुर नगरपालिकाका प्रमुख सुनिल प्रजापतिले विश्वव्यापी महामारीका रुपमा फैलिरहेको कोभिड–१९ लाई मध्यनजर गरी जात्रामा हुन सक्ने सम्भावित जोखिमबाट बच्नको लागि यसपालिको जात्रा भीडभाड नगरी औपचारिक पूजामा मात्र सीमित गर्ने निर्णय बैठकले लिएको जानकारी दिए ।

प्रमुख प्रजापतिले सरकारले लकडाउन गरिरहेको समय बैशाख ३ गते सम्म तोकिएको बताउदैँ सोही अवधि भित्र जात्रा भएकोले औपचारिक पूजामा मात्र सीमित गर्ने निर्णय भएकोले आवश्यक काममा बाहेका घरबाट बाहिर ननिस्कन आग्रह गरे ।

भक्तपुरका जनतालाई कोरोना भाइरस संक्रमण जोखिमलाई ध्यानमा राखेर यो बर्षको बिस्का जात्रा घरमै बसी पूजा गर्न पनि आग्रह गर्ने निर्णय बैठकले लिएको छ ।

यो बर्ष कुनै पनि देवीदेवताहरु देवघर तथा मन्दिरबाट बाहिर ननिकाल्ने र मन्दिर तथा देवघर (द्यःछेँ) भित्रै औपचारिक सामान्य पूजा गरि बिस्केट जात्रा मनाउने गर्ने निर्णय पनि बैठकले गरेको छ ।

नगर प्रमुख सुनिल प्रजापतिको सभापतित्वमा बसेको बैठकमा प्रमुख जिल्ला अधिकारी हुमकाला पाण्डे, महानगरीय प्रहरी परिसर भक्तपुरको प्रहरी उपरीक्षक सविन प्रधान, भनपाका वडाअध्यक्षहरु, गुठी संस्थानका प्रमुख, सबै जात्राका सम्वन्धित प्रतिनिधिहरुको उपस्थित रहेको थियो ।

ईतिहास मै पहिलोपटक यसवर्ष यो जात्रा रोकिएर औपचारिक पूजामा मात्रै सिमित हुने भएको हो ।