काठमाडौं – कोरोनाभाइरसले इटालीमा एकैदिन १ सय ३३ जनाको मृत्यु भएपछि मृतकको संख्या ३ सय ६६ पुगेको छ ।

उपचारारत ६ हजार ३ सय ८७ मध्ये ६ सय ५० जना सिकिस्त बिरामी रहेकाले मृतकको संख्या अझ बढ्न सक्ने अन्तर्राष्ट्रिय सञ्चारमाध्यमहरुले जनाएका छन् ।

संक्रमित हुनेको संख्या पनि २५ प्रतिशतले बढेको छ । शनिबारसम्म ५ हजार ८ सय ८३ जनामा संक्रमण देखिएकोमा आइतबार साँझसम्म ७ हजार ३ सय ७५ जना मानिसमा संक्रमण देखिएको छ ।

अवस्था भयाभह बनेपछि सरकारले १ करोड ६० लाख मानिसलाई क्वारेन्टाइनमा राखेको छ ।

इटालीको उत्तरी क्षेत्रसहित १४ प्रान्तका एक करोड ६० लाख मानिसलाई अनिवार्य क्वारेन्टाइनमा राखिएको हो ।

अप्रिल ३ सम्मका लागि अनिवार्य गरिएको क्वारेन्टाइनबाट बाहिर जान परे विशेष अनुमति लिनुपर्ने व्यवस्था गरिएको छ ।