काठमाडौं – गायक तथा मोडल दुर्गेश थापामाथि गीत चोरीको आरोप लागेको छ । उनले हालै रिलिज गरेको ‘बीच्च बीच्चमा २’ बोलको गीतमा अन्तरा चोरी गरेको आरोप लागेको हो ।

उक्त गीतमा ‘आकाशमा बादलु डम्मै छ, मनमा के छ भन्नेलाई सम्मै छ’ भन्ने अन्तरा सुन्न सकिन्छ । जुन अन्तरा लोककवि अली मियाँको एक गीतमा पनि प्रयोग गरिएको छ ।

‘आकाशमा बादलु डम्मै छ’ बोलको गीतलाई गायक प्रेमराजा महत र हरिदेवी कोइरालाले एक दशकअघि गाएका थिए । दुवै गीत युट्युबमा पनि उपलब्ध छन् । त्यही गीतको अन्तराले दुर्गेशले जस्ताको तस्तै आफ्नो गीतमा प्रयोग गरेपछि उनी विवादमा तानिएका हुन् ।

गायक दुर्गेश थापाले भने आफूले गाउँतिर सुनेका आधारमा गीतमा उक्त अन्तरा प्रयोग गरेको प्रतिक्रिया दिएका छन् ।

दुर्गेशको ‘बीच्च बीच्चमा २’ ले चर्चा कमाइरहेको छ । गतवर्ष उनले ‘बीच्च बीच्चमा’ बोलको गीत सार्वजनिक गरेका थिए । उक्त गीतले उनलाई वर्षभरि नै चर्चामा ल्याएको थियो ।

साथै तिहारको अवसर पारेर सार्वजनिक गरिएको गीत ‘ह्याप्पी तिहार’ ले भने उनलाई विवादमा तानेको थियो । विवादपछि दुर्गेशले सो गीत युट्युबबाट हटाएका थिए ।