काठमाडौं – प्रधानमन्त्री केपी शर्मा ओलीले कोरोना भाइरसको सम्भावित जोखिमलाई आकलन गर्दै ३० हजार ५६६ व्यक्तिलाई राख्न मिल्ने गरी क्वारेन्टाइन तयारी अवस्थामा राखिएको बताएका छन् ।

राष्ट्रका नाममा टेलिभिजनमार्फत सम्बोधन गर्दै प्रधानमन्त्री ओलीले आगामी साता अझ भयावह हुने जनाउ समेत दिए ।

यस्तै अवस्थालाई ध्यानमा राखेर सरकारले उक्त क्षमताका क्वारेन्टाइन बनाएको उनले बताएका छन् । ती क्वारेन्टाइनमा ९ हजार १ सय ६८ जनालाई राखेर निगरानी बढाइएको समेत प्रधानमन्त्री ओलीले जानकारी दिएका छन् ।

यस्तै ३ हजार २५९ क्षमताको आइसोलेसन बेड पनि तयार पारिएको उनले जानकारी दिएका छन् । ओलीका अनुसार ९५ जना आइसोलसनमा उपचारारत रहेका छन् ।

‘सरकार सकभर संक्रमण फैलन नदिन र फैलिनै हाले पनि त्यसलाई रोक्न तयारी अवस्थामा जुटेको छ,’ प्रधानमन्त्री ओलीले भने,’यसअवधिमा सातै प्रदेशबाट पीसीआर प्रविधिबाट परीक्षण सुरु गरिएको छ ।’