काठमाडौं– बालुवाटारको ललित निवास (कम्पाउण्ड)को जग्गा प्रकरणमा दायर भएको मुद्दामा पहुँचवालाई अन्मुक्ति खोजिएको भन्दै अख्तियार दुरुपयोग अनुसन्धान आयोगको कार्यालयमा विरोध प्रदर्शन गर्न गएकालाई प्रहरीले पक्राउ गरेको छ ।

ललिता निवास प्रकरणमा सत्तारुढ दल नेपाल कम्युनिस्ट पार्टी (नेकपा)का नेताहरुलाई जोगाउन खोजिएको विरोधमा सिटी जुलुस निकाल्न गएका साझा पार्टीका नेता तथा कार्यकर्तालाई प्रहरीले पक्राउ गरेको हो ।

साझा पार्टीका संयोजक रवीन्द्र मिश्रका अनुसार बालुवाटार जग्गा प्रकरणमा अख्तियारले ‘शुरु गरेको राम्रो कामको स्वागत’ तथा केही नेताहरुलाई जोगाउन खोजेको भन्दै विरोध जनाउने क्रममा केही नेता कार्यकर्ता पक्राउ परेका छन् ।

संयोजक मिश्रले साझा पार्टीकी बाग्मती प्रदेश संयोजक समिक्षा वास्कोटासहित नेताहरु नारायण कोइराला, प्रकाशचन्द्र परियार, शरदराज पाठक, अब्दुस मिया लगायत पक्राउ परेका जानकारी दिएका छन् ।

बालुवाटारको सरकारी जग्गा विभिन्न व्यक्तिको नाममा नामसारी गरी भ्रष्टाचार गरेको अभियोगमा अख्तियारले बुधबार मात्रै १ सय ७५ जनालाई प्रतिवादी बनाएर विशेष अदालतमा मुद्दा दायर गरेको थियो । उक्त मुद्दामा १ सय १० जनाले भ्रष्टाचार गरेको भन्दै बिगोसहित कैद सजाय मागदाबी गरिएको छ भने ६५ जनालाई सम्पत्ति तथा जग्गा जफत प्रयोजनका लागि प्रतिवादी बनाइएको छ ।