काठमाडौं- नेपाली काँग्रेसका पाँच जना केन्द्रीय सदस्यलाई कोरोना भाइरसको संक्रमण देखिएको छ ।

केन्द्रीय सदस्य तथा पूर्वमन्त्री दिलेन्द्रप्रसाद बडु , केन्द्रीय सदस्य सुरेन्द्र पान्डे , केन्द्रीय सदस्य एवं सांसदय सुजाता परियार, केन्द्रीय सदस्य किरण यादव, केन्द्रीय सदस्य मोहमद नसिर सिद्दिकी, र आमन्त्रित केन्द्रीय सदस्य कृष्णकिशोर घिमिरेलाई कोरोना पोजिटिभ देखिएको हो ।

कोरोना सक्रमण देखिएका सबैजना होम आइसोलेसनमा बसेका छन् । बिहीबार पार्टी कार्यालय सानेपामा गरिएको पीसीआर परीक्षणमा उनीहरुको रिपोर्ट पोजेटिभ आएको हो ।

शुक्रबारका लागि निर्धारित केन्द्रीय कार्यसमिति बैठकका लागि केन्द्रीय सदस्य र आमन्त्रित केन्द्रीयको कोरोना परीक्षण गरिएको थियो ।

पार्टी विवाद समाधान नहुँदा र केन्द्रीय सदस्यमा कोरोना देखिएपछि २४ गतेका लागि बैठक सारिएको छ । यस्तै काँग्रेस केन्द्रीय सदस्य फरमुल्लाह मन्सुर पनि कोरोना संक्रमणपछि अस्पताल भर्ना भएका छन्।

यस्तै केन्द्रीय सदस्य मिन बिश्वक्रम पनि कोरोना संक्रमणपछि अस्पतालमा छन् । उनको पछिल्लो कोरोना परीक्षणको रिपोर्ट भने नेगेटिभ आएको भएपनि उनी अस्पतालमै उपचाररत छन् ।