इलाम- इलामको बरबोटेमा सञ्चालित सप्तमाई गुरुकुल संस्कृत वाङमय अध्ययन तथा अनुसन्धान केन्द्रको भवन आज उद्घाटन गरिएको छ ।

भारत सरकारको सहयोगमा निर्मित २४ कोठे भवन आज एक कार्यक्रमका बीच उद्घाटन गरिएको विद्यालयका प्रधानाध्यापक छविलाल रेग्मीले जानकारी दिए ।

रेग्मीका अनुसार भारत सरकारको करिब ४ करोड रुपैयाँको लागतमा निर्मित भवन भिडियो कन्फरेन्सबाट उद्घाटन गरिएको हो । उद्घाटन कार्यक्रममा विद्यालय व्यवस्थापन समितिका पदाधिकारीसहित विद्यार्थीको सहभागिता थियो ।

भारतीय दूतावासका पदाधिकारी भने भिडियो कन्फरेन्सबाट उद्घाटन समारोहमा सहभागी भएका थिए ।

नेपाल भारत मैत्री भवन नाम राखिएको २४ कोठे भवन छात्रावास तथा पठनपाठनका लागि प्रयोग हुने प्रअ रेग्मीले बताए ।

भिडियो कन्फरेन्सबाट भवन उद्घाटन समारोहमा सहभागी भएका नेपालका लागि भारतीय राजदूत विनय मोहन क्वात्राले भवन निर्माणमा सहयोग गर्न पाएकोमा खुसी व्यक्त गरेका छन् ।

सन् २००९ मा प्राथमिक विद्यालयको रुपमा स्थापित यो विद्यालय सन् २०१५ मा माध्यमिक तहमा स्तरोन्नति भएको थियो । विद्यालयमा अध्ययनरत विद्याथीहरुलाई दक्ष तथा आधुनिक रुपमा संस्कृत भाषामा अध्यापन गराइँदैछ ।