काठमाडौं- विश्वव्यापी महामारीको रुपमा फैलिएको कोरोना भाइरस संक्रमणको जोखिमलाई मध्यनजर गर्दै सरकारले मुलुकभर लकडाउन लागू गरेको छ ।

लकडाउनका कारण दैनिक ज्याला मजदुरी गर्नेहरु सबैभन्दा बढी प्रभावित बनेका छन् । त्यो भन्दा बढी सडमा रहेका पशु चौपायाहरु प्रभावित छन् । सडकमा भएका पशु-चौपायाहरुले खान पाए/नपाएकोप्रति धेरैको ध्यान जान सकेको छैन ।

यही अवस्थालाई ध्यानमा राखेर बुढानिलकण्ठ क्षेत्रका युवाहरुले सडकमा भोकै रहेका कुकुरहरुलाई दैनिक खाना खुवाउँदै आएका छन् ।

‘मिलेर गरम्, सकेको गरम्’ अभियनाका साथ बुढानिलकण्ठ नगरपालिका वडा नं. १० र १२ का युवाहरुले सडकका कुकुरहरुलाई दैनिक खाना खुवाउने गरेका हुन् ।

उनीहरुले सकेको सहयोग उठाएर सडकका कुकुरहरुलाई दैनिक खाना खुवाउँदै आएका छन् । यो अभियान लकडाउन अवधिभर मात्र नभएर निरन्त गरिने उनीहरुले बताएका छन् ।

अभियानमा स्थानीय युवाहरु दिपेश भण्डारी, राहुल लुइँटेल, सुदीप लुइँटेल, नवीन रिमाल, सौरभ अधिकारी, अनिल कार्की, किरण थापामगर, साहिल गौतम , नयन रिमाल, अनुज लुइँटेल लगायत छन् ।

‘सेवा नै सबैभन्दा ठूलो धर्म हो’, अभियानमा सामेल साहिल गौतमले भने, ‘यो विषम परिस्थितिमा मानवलाई मात्र होइन पशुपँक्षी तथा जीवजनावरहरुलाई पनि साथ र सहयोगको खाँचो छ, त्यो हामीले बुझेका छौं । अभियानलाई निरन्तरता दिने छौं ।’

सहयोगी हातहरुलाई अभियनमा साथ दिन आग्रह गर्दै उनले दैनिक छाक टार्न गाह्रो हुनेहरुलाई समेत आफूहरुले सहयोग गर्दै आएको जानकारी दिए ।