काठमाडौं – कोरोना भाइरसको संकटपछि साउदी अरवका रोजगारदाताहरुले श्रमिकको ४० प्रतिशत तलव कटौती गर्ने भएका छन् ।

साउदी अरब सरकारले निजी क्षेत्रका कम्पनीहरुलाई कामदारको तलब ४० प्रतिशतसम्म कटौती गर्न अनुमति दिएसँगै हजारौँ नेपाली मर्कामा पर्ने भएका छन् ।

साउदी अरबको प्रमुख पत्रिका अशराक अल अवसातका अनुसार आर्थिक संकट बढ्दै गए कामदार कटौतीको नीति पनि अवलम्बन गर्न सरकारले अनुमति दिएको छ ।

कोरोना भाइरसको महामारी जारी रहे तलव कटौती गरेको ६ महिनापछि कम्पनीहरुले कर्मचारीको सम्झौता रद्द गर्न पनि स्वीकृती दिइएको छ ।

तलब कटौतीको निर्णय लागू गरिएको ६ महिना पूरा भएको, कामदारले पाउने सबै बिदा सकिसकेको तथा कोरोनाभाइरसको महामारीका कारण आर्थिक संकटको सामना गरिरहेको प्रमाणित भएमा रोजगारदाता कम्पनीले कामदार कटौती गर्न सक्नेछन् ।

साउदी सरकारको उक्त अनुमतीसँगै त्यहाँ कार्यरत करिब ४ लाख नेपालीहरु मर्कामा पर्ने भएका छन् ।