रामेछाप– कोरोना भाइरसको संक्रमण फैलिन नदिन सरकारले जारी गरेको लकडाउनका बेला नक्कली बिरामी बनाएर यात्रु बोक्ने एम्बुलेन्स चालक पक्राउ परेका छन् ।

जिल्ला प्रहरी कार्यालय रामेछापका अनुसार मन्थली नगरपालिका–६ बाट नक्कली बिरामी बनाएर एम्बुलेन्समा बोक्ने चालक पक्राउ परेका हुन् ।

पक्राउ पर्नेमा प्रदेश–३–०१–०२२ च २१६३ नम्बरको एम्बुलेन्सका चालक २२ वर्षीय बुद्ध तामाङ छन् । रामेछापकै गोकुलगङ्गा गाउँपालिका–६ फुर्पु घर भएका तामाङले सर्वसाधारणलाई बिरामी भन्दै एम्बुलेन्समा यात्रा गराउने गर्दथे ।

यसरी नक्कली बिरामी बनाइ एम्बुलेन्समा यात्रा गराएबापत उनले महङ्गो भाडा समेत उठाउने गरेको प्रहरीले जनाएको छ ।

प्रहरीले सोमबार उनलाई नक्कली बिरामी बनाएर यात्रु बोकिरहेको अवस्थामा सेलेघाटमा फत्राउ गरेको हो ।