काठमाडौं – कोरोना भाइरसका बिरामीको उपचार भइरहेको सेती प्रादेशिक अस्पतालमा गरिएको परीक्षणमा पछिल्लो २४ घण्टामा थप ४५ जनामा कोरोना संक्रमण पुष्टि भएको छ ।

आइतबार अस्पतालले एक विज्ञप्तिमार्फत १ सय ३७ जनाको कोरोना परीक्षण गरिएको र तीमध्ये ४५ जनाको रिपोर्ट पोजेटिभ आएको जनाएको छ । नयाँ थपिएका संक्रमितहरु मध्ये १२ जना महिला र ३३ जना पुरुष रहेका छन् । उनीहरु डडेल्धुरा, कैलाली र कञ्चनपुरका रहेका छन् ।

नयाँ थपिएका संक्रमितहरु डडेल्धुराका एक महिला र ४ जना पुरुष, कैलालीका ३ जना महिला र ९ जना पुरुष र कंचनपुरका ६ र १२ वर्षकी २ जना बालिकासहित ८ जना महिला र ४, ७, ११, ११, १३ वर्षका ५ बालक सहित २० जना पुरुष रहेका छन् ।

योसँगै उक्त अस्पतालमा परीक्षण गरिएकामध्ये हालसम्म ९ सय ७७ जनामा कोरोना संक्रमण पुष्टि भएको अस्पतालले जनाएको छ ।