वीरगन्ज– सरकारले कोरोना भाइरस (कोभिड १९) को संक्रमण रोक्न देशव्यापी लकडाउन गरेको मौका छोप्दै तस्करहरुले नेपालबाट भारतीय बजारतर्फ इन्धन तस्करी गर्न थालेका छन् ।

नेपालको तुलनामा भारतीय बजारमा महङ्गो मूल्यमा पाइने पेट्रोल र डिजेल नेपालबाट भारत तस्करी हुन थालेको हो ।

कोरोनाका कारण भारतमा पनि ३ साता लामो लकडाउनका कारण बजार बन्द छ । सीमावर्ती बजारमा पेट्रोल पम्पहरु समेत बन्द छन् । यस्तो अवस्थामा तस्करहरुले नेपालका पम्पबाट इन्धन भरेर भारतीय बजारमा महङ्गो मूल्यमा बिक्री गर्न थालेका छन् ।

शनिबार मात्रै पर्सा प्रहरीले भारततर्फ तस्करी गर्न लागिएको ४ सय लिटर डिजेल र २ सय लिटेर पेट्रोल बरामद गरेको छ ।

प्रहरीका अनुसार शनिबार साँझ करिब ६ बजेको समयमा तस्करहरुले नेपालको वीरगन्जबाट भारततर्फ पेट्रोल र डिजेल तस्करी गर्न लागेका थिए । तर, गस्तीमा रहेको प्रहरी टोली देखेपछि उनीहरु बीच बाटोमै इन्धन छाडेर भागेका थिए ।

प्रहरीले बीच बाटोमा छाडिएका डिजेलका २ र पेट्रोलको १ वटा ड्रम बरामद गरेको छ ।