विराटनगर– प्रदेश नम्बर १ को संखुवासभा र धनकुटा गरी पानीमा डुबेर १ बालिकासहित २ जनाको मृत्यु भएको छ ।

आइतबार दिउँसो संखुवासभाको सभापोखरी गाउँपालिका–२ की ३२ बर्षीया चन्द्र कुमारी राई पानीमा डुबेका अवस्थामा मृत फेला परेकी थिइन् ।

सभापोखरी गाउँपालिका–१ को सादीबेसीमा रहेको दिब्यश्वरी हाइड्रो पावरको पानी जमाउने पोखरीमा डुबिरहेको अवस्थामा राईको शव फेला परेको थियो ।

घटनाको जानकारी पाए लगत्तै जिल्ला प्रहरी कार्यालय संखुवासभाबाट खटिएको प्रहरी टोलीले कानूनी प्रक्रिया पुरा गरी शव परिक्षणको लागी जिल्ला अस्पताल खाँदवारी पठाएको छ ।

प्रहरीले घटनाको सम्बन्धमा थप अनुसन्धान भइरहेको जनाएको छ ।

यस्तै, धनकुटाको धनकुटा नगरपालिका–१ जौटार बस्ने राजिव तितुङको १८ महिनाकी छोरी सिर्जना तितुङको आफ्नै घरमा रहेको पानीको ड्रममा डुबेर मृत्यु भएको छ ।

जिल्ला प्रहरी कार्यालय धनकुटाबाट खटिएको प्रहरी टोलीले कानूनी प्रकृया पुरा गरी शव परिक्षणको लागी जिल्ला अस्पताल धनकुटा पठाएको छ ।