काठमाडौं– टेकुस्थित शुक्रराज ट्रपिकल तथा सरुवा रोग अस्पतालले कोरोनाका विरामीको उपचारमा खटिएका डाक्टर तथा नर्सलाई क्वारेन्टाइनमा राखेको छ ।

शुक्रराज अस्पतालमा दोस्रो केस देखिए देखि नै कोरोनाका विरामीको उपचारमा संलग्न चिकित्सक तथा नर्सलाई अस्पताल नजिकै क्वारेन्टाइनको व्यवस्था गरिएको हो ।

अस्पताल का निर्देशक डाक्टर सागर राज भण्डारीले कोरोनाको उपचार मा खटिएका करिव २० जना डाक्टर तथा नर्सलाई क्वारेन्टाइनमा राखिएको बताए । ‘खास गरेर आइसोलेसनमा काम गर्नुभएको १० देखि २० जना जति डाक्टर र नर्स घर जानु हुँदैन, हामीले अस्पताल नजिकै तालिम केन्द्रको भवनमा रहेको होस्टेलमा बस्ने व्यवस्था गरेका छौं,’ डा भण्डारीले खबरहबसँग भने, ‘उहाँहरु उपचारमा खटिए पछि क्वारेन्टाइनमा त राख्नुपर्यो नि ।’

डा भण्डारीले टेकु अस्पतालमा दोस्रो बिरामीमा कोरोना पोजेटिभ देखिए पछि डाक्टर तथा नर्सलाई क्वारेन्टाइनमा राखिएको बताए ।

डा भण्डारीले आइसोलेसनमा खटिएका डाक्टर तथा नर्सको परिवारका सदस्यहरुलाई कोरोना सर्ने जोखिम नहोस् भनेर उनीहरुलाई क्वारेन्टाइनमा राखिएको बताए ।

‘उहाँहरु ड्युटीमा आउनुहुन्छ र अस्पतालले व्यवस्था गरेको क्वारेन्टाइनमा बस्नु हुन्छ । उहाँहरु सोसल कन्ट्रयाकमा हुनुहुन्न,’ डाक्टर तथा नर्सको परिवारमा बालबालिका वृद्धवृद्धा हुन सक्नुहुन्छ । आइसोलेसनमा खटिएका डाक्टर तथा नर्सको कारण परिवारमा पनि कोरोनाको जोखिम हुनसक्ने भएकाले हामीले यहाँहरूलाई क्वारेन्टाइन को व्यवस्था गरेको हो ।’