काठमाडौं- इंग्लिस प्रिमियर लिग क्लबहरुले खेलाडीसँग ३० प्रतिशत पारिश्रमिक कटौतिका लागि आग्रह गर्ने भएका छन्।

यस्तै सुरक्षित र उपयुक्त नठानिएसम्म रोकिएका लिगका खेलहरु शुरु नगर्ने पनि प्रिमियर लिग क्लबहरुबीच सहमति बनेको छ।

विश्वव्यापी महामारीका रुपमा फैलिएको कोरोना भाइरसको महामारीका कारण प्रिमियर लिगका खेलहरु अहिले स्थगित छन्।

खेल स्थगित हुँदा क्लबलाई परेको आर्थिक भार कम गरी खेलाडी बाहेकका कर्मचारीहरुलाई तलब खुवाउन सहज होस् भन्ने उद्देश्यले क्लबहरुले खेलाडीसँग ३० प्रतिशत पारिश्रमिक कटौतिका लागि आग्रह गर्ने भएका हुन् ।

शुक्रकार प्रिमियर लिग क्लबहरुबिच भएको भिडियो कन्फ्रेन्स मार्फतको बैठकमा यस्तो सहमति बनेको हो । क्लबहरु सबै लिग र कपका खेलहरु पूरा गर्ने पक्षमै छन् ।

प्रिमियर लिगको यो सिजन मेको शुरुमा पुनः शुरु हुने सम्भावना नरहेको र उपयुक्त लागेको समयमा मात्रै निर्णय गरिने क्लबहरुले बताएका छन्।