काठमाडौं- भारतीय स्थल सेनाध्यक्ष मनोजमुकुन्द नरभणेले नेपालीसँग दीर्घकालीन सम्बन्ध सुदृढ गर्न नेपाल भ्रमण गर्न लागेको बताएका छन् ।

भारतको समाचार एजेन्सी एएनआईलाई मंगलबार प्रतिक्रिया दिने क्रमना उनले नेपालसँग दीर्घकालीन सम्बन्ध सुदृढ गर्न भ्रमण गर्न लागेको बताएका हुन् ।

उनी बुधबारदेखि नेपालको तीनदिने औपचारिक भ्रमणका लागि आउनेछन् ।

‘म नेपाल भ्रमणमा जाने र मेरा नेपाली समकक्षी जनरल पूर्णचन्द्र थापासँग भेट्ने अवसरका लागि खुशी छु,’ नरभणेले भनेका छन्, ‘यो भ्रमणले दुई देशका सेनाबीचको सम्बन्ध र मित्रता थप सुदृढ गर्न लामो मार्ग तय गर्नेछ भन्नेमा म ढुक्क छु ।’

उनले नेपालका प्रधानमन्त्रीसँग भेट्ने अवसरका लागि पनि आभारी रहेको बताएका छन् । त्यसैगरी नेपालका राष्ट्रपतिबाट नेपाली सेनाको मानार्थ महारथी पदबाट विभूषित हुन पाउनु पनि ठूलो सम्मान भएको जनाएका छन् ।