काठमाडौं– बीपी कोइराला स्वास्थ्य विज्ञान प्रतिष्ठान धरानमा सप्तरीका दुई जना कोरोना संक्रमितको मृत्यु भएको छ ।

प्रतिष्ठानका सूचना अधिकारी डाक्टर निदेश सापकोटाका अनुसार सप्तरीका ५५ वर्षका एक जना पुरुष र सप्तरीकै ५० वर्षका अर्का एक पुरुषको मृत्यु भएको हो ।

दुवै जना पुरुष सप्तरीको राजविराज–७ का स्थानीय हुन् ।

डा सापकोटका अनुसार ५५ वर्षका पुरुषमा १५ वर्षअघिदेखि मधुमेह र उच्च रक्तचापको समेत समस्या थियो ।

ती पुरुषमा भदौ ७ गते कोरोना पुष्टि भएको थियो । उनलाई स्वास्थ्यमा समस्या देखिएपछि छिन्नमस्ता अस्पताल सप्तरीले बीपी प्रतिष्ठानमा भदौ ४ गते रेफर गरेको थियो ।

भदौ ७ गते कोरोना पुष्टि भएपछि अस्पतालकै कोभिड वार्डको आईसीयुमा उपचाररत उनको आज दिउँसो १ बजेर १५ मिनेटमा मृत्यु भएको हो ।

यस्तै सप्तरीकै अर्का मृतक ५० वर्षका पुरुषमा पनि पहिला देखि नै मधुमेहको समस्या थियो ।

उनलाई ज्वरो, श्वासप्रश्वासमा समस्या र शरीर सिथिल हुने समस्या देखिएपछि भदौ १८ गते बीपी अस्पतालमा भर्ना भएका थिए ।

उनको आज दिउँसो २ बजेर २ मिनेटमा मृत्यु भएको र बिहीबार नै कोरोनाको रिपोर्ट पनि पोजेटिभ आएको डा सापकोटाले जानकारी दिए ।