काठमाडौं- सलह किरा रोकथामको लागि नेपालमै बनेको ड्रोनको सफल परीक्षण गरिएको छ ।

कृषि ज्ञान केन्द्र चितवन, भेजिटेबल क्रप्स डेभल्पमेन्ट सेन्टर र मधुका ड्रोन सर्भिसेसको सहकार्यमा मधुका कृषक ड्रोनको सफल परीक्षण गरिएको हो ।

मधुका कृषक ड्रोनको सहयोगले किटनाशक औषधि छर्केर सलह किरा रोकथाम गर्न सकिने मधुका ड्रोन सर्भिसेसका प्रमुख कार्यकारी अधिकृत शम्भु शिवाकोटीले जानकारी दिए ।

एकपटकमा किटनाशक औषधि बोक्ने क्षमता २५ केजी भएपनि पहिलो पटक १० केजी राखेर परीक्षण गरिएको उनले बताए ।

अहिले परीक्षण गरेको ड्रोन भर्सन वान रहेको र यसलाई भर्सन टुमा अपग्रेड गर्नको लागि बाहिरबाट मगाएको सामग्रीहरु लकडाउनले गर्दा रोकिएको उनले बताए ।

स्प्रे गर्दा ६ वटा मोटर चल्ने भएकाले यसको साउन्ड पनि ठूलो हुन्छ र जसले गर्दा सलह किरा भगाउन सकिने छ । साथै साउन्डको लागि स्पीकरलाई ड्रोनमा राखेर पनि बजाउन सकिने छ ।

मधुका ड्रोन सर्भिसेसले बनाएको यो ड्रोन सलह किरा रोकथामको लागि मात्र नभएर अन्य प्रयोजनका लागि पनि उपयोगी हुने उनले बताए ।