काठमाडौं– प्रधानमन्त्रीको सरकारी निवास बालुवाटारमा मन्त्रिपरिषद बैठक शुरु भएको छ ।

प्रधानमन्त्री केपी शर्मा ओलीको निर्देशनानुसार आइतबार मध्याह्न बोलाइएको बैठक केही समय अगाडिदेखि शुरु भएको हो ।

बैठकका एजेन्डाबारे पूर्व जानकारी गराइएको छैन । यद्यपि सरकारका नीति तथा कार्यक्रमका विषयमा छलफल गर्न बैठक बोलाइएको हुन सक्ने एक मन्त्रीले जानकारी दिए ।

संवैधानिक व्यवस्थाअनुसार आगामी जेठ १५ भित्र सरकारले आगामी आर्थिक वर्षको वार्षिक बजेट सार्वजनिक गरिसक्नु पर्ने हुन्छ ।

बजेट सार्वजनिक गर्नु अगाडि सरकारको नीति तथा कार्यक्रम संसदमा पेश गर्नु पर्ने हुन्छ ।

हालसम्म शुरु भइसक्नुपर्ने संसदको बजेट अधिवेशन कोरोना भाइरसको महामारीका कारण शुरु हुन सकेको छैन ।

संघीय संसद सचिवालयले संसदको बजेट अधिवेशन सञ्चालन गर्नका लागि आवश्यक तयारी लगभग पूरा भइसकेको जनाएको छ । सभामुख अग्नि सापकोटाले प्रधानमन्त्री ओलीलाई भेटेरै जतिसक्दो छिटो संघीय संसदको बजेट अधिवेशन आह्वानका लागि राष्ट्रपतिसमक्ष सिफारिस गर्न आग्रह गरेका छन् ।

सभामुख सापकोटाले कोरोना भाइरसको महामारीलाई ध्यानमा राख्दै सामाजिक दूरी कायम हुने गरी संसद बैठक सञ्चालन गर्न सकिने प्रधानमन्त्रीलाई जानकारी दिएका थिए ।

प्रधानमन्त्री ओलीले केही दिन अगाडि संसद बैठक सञ्चालनका लागि संघीय संसद भवनमा भइरहेको तयारीबारे स्थलगत निरीक्षण गरेका थिए ।