काठमाडौं – यस वर्षको प्रतीक्षित फिल्म ‘प्रेम गीत ३’ को चर्चा छ । यतिबेला निर्माण टिमले अभिनेता जीवन भट्टराईको फस्ट लूक सार्वजनिक गरेको छ ।

पोस्टरमा भट्टराईलाई फरक भूमिकामा देखाइएको छ । उनी लामो कपालसहित चरित्रमा प्रस्तुत भएका छन् ।

निर्माण टिमले यसअघि पनि फिल्ममा समावेश कलाकारको क्यारेक्टर लूक एकपछि अर्को गर्दै सार्वजनिक गर्ने गरेको छ ।

छिट्टै नै ट्रेलर रिलिज गर्न लागेको टिमले फिल्म राम्रो भएको दाबी गर्दै आएको छ ।

एक बन्देज प्रेमकथा भनिएको यो फिल्ममा राजेश श्रेष्ठको छायांकन, वनिष शाह र भुपेन्द्र अधिकारीको सम्पादन, छेतेन गुरुङ र मन्दिप गौतमको लेखन तथा हिमाल केसीको द्वन्द्व निर्देशन छ ।

फिल्ममा मुख्य लगानी सन्तोष सेनको रहेको छ भने निर्माता सेन र छेतेन गुरुङले फिल्म निर्देशन गरेका हुन् ।

यो फिल्ममा प्रदीप खड्का, क्रिष्टिना गुरुङ, शिव श्रेष्ठ, सुनील थापा, सन्तोष सेन, माओत्से गुरुङ, मनिष राउत, पुष्कर कार्की, प्रेम पुरी, लक्ष्मी बर्देवा, जीवन भट्टराई लगायतका कलाकारको अभिनय रहनेछ ।

चैत्र २८ गतेदेखि प्रदर्शनमा आउने फिल्मले केही गीत सार्वजनिक गरिसकेको छ । ती गीत दर्शकले रुचाएका छन् ।