काठमाडौं- विभागीय टोली सशस्त्र प्रहरी बल (एपीएफ)ले सहिद स्मारक ए डिभिजन लिग फुटबल प्रतियोगितामा पहिलो जित हासिल गरेको छ ।

ललितपुरको सातदोबाटोस्थित एन्फा (अखिल नेपाल फुटबल सङ्घ) कम्प्लेक्समा आज भएको चौथो चरणको अन्तिम खेलमा एपीएफले सरस्वती युवा क्लबलाई २–१ गोलअन्तरले पराजित गर्दै जारी लिगमा पहिलो जित दर्ता गराएको हो ।

जितसँगै एपीएफ ११औँ स्थानमा उक्लेको छ भने पराजित सरस्वती अंकविहीन रहँदै अंकतालिकाको अन्तिम स्थानमा छ । यस खेलसँगै चार खेल खेलेको एपीएफले भने एक जित, एक बराबर र दुई हारसँगै चार अंक जोडेको छ ।

एपीएफको जितमा आशिष लामा नायक बने । उनले खेलको ६३ औँ मिनेटमा गोल गर्दै एपीएफलाई पहिलो अग्रता दिलाए ।

खेलको दोस्रो हाफको अत्तिरिक्त समयमा आशिषले व्यक्तिगत दोस्रो गोल गर्दै एपीएफको जित सुनिश्चित गरे । आशिषले गोल गरेलगत्तै सरस्वतीका विनोद केसीले एक गोल फर्काएका थिए ।