अमेरिका जान चाहने, ग्रिन कार्ड लिन चाहने तथा नागरिकताका लागि आवेदन दिने आप्रवासीको सामाजिक सञ्जाल अनुगमनका लागि अमेरिकाको नागरिकता तथा अध्यागमन सेवाले नक्कली खाता अर्थात् फेक आइडी बनाउने भएको छ ।

यसअघि गोपनियताका कारण होमल्याण्ड सेक्युरिटी डिपार्टमेन्टले यस्तो गर्न बन्देज गरेपनि गत जुनयता भने अमेरिकाको नागरिकता तथा अध्यागमन सेवाले आफ्नो नीतिमा परिवर्तन गरेको अमेरिकाको फक्स न्यूजले उल्लेख गरेको छ ।

नागरिकता तथा अध्यागमन सेवाले विज्ञप्ति जारी गर्दै यस्ता फेक आईडीले प्रयोगकर्ताको खुला रुपमा सामाजिक सञ्जालमा उपलब्ध समग्रीको मात्र अनुगमन गर्नेछ । त्यसबाहेक यस्ता आईडीले प्रयोगकर्ताको गोपनियताको सम्मान गर्ने र उनीहरुलाई फलो वा साथी नबनाउने नागरिकता तथा अध्यागमन विभागले स्पष्ट पारेको छ ।

यस निकायले प्रयोगकर्ताका सामाजिक सञ्जालमा उपलब्ध सामग्रीको सूक्ष्मतापूर्वक अध्ययन नगर्ने समेत जनाएको छ ।

आप्रवासीका कारण उत्पन्न सम्भावित सुरक्षा चुनौति तथा आप्रवासीको पृष्ठभूमि अध्ययनका लागि यस्तो नीति ल्याइएको नागरिकता तथा अध्यागमन सेवाको भनाइ छ ।

गत जुन महिनादेखि अमेरिकाको विदेश मन्त्रालयले आवेदकको सामाजिक सञ्जालको सूचना समेत माग गर्न थालेको थियो ।

यद्यपि नागरिकता तथा अध्यागमन निकायको पछिल्लो नीतिले फेसबुक, ट्विटरजस्ता सामाजिक सञ्जाल कम्पनीको नीति भने उल्लङ्घन हुनसक्ने अमेरिकी सञ्चारमाध्यमले जनाएका छन् । यस्ता सामाजिक सञ्जालको नीति नियम अनुसार फेक आइडी बनाउन पाइँदैन ।