न्यूयोर्क– पाकिस्तानी मूलका एक अमेरिकी नागरिकले आतंककारी संगठन इस्लामिक स्टेटका लागि न्यूयोर्क शहरमा आक्रमणको योजना बनाएको अमेरिकी अधिकारीले जनाएका छन् ।

अमेरिकी राष्ट्रिय सुरक्षाका लागि सहायक महान्यायाधिवक्ता जोन डेमेर्सले जनाएअनुसार पाकिस्तानी मूलका १९ वर्षे अविस चौधरीले न्यूयोर्क शहरमा आक्रमणको योजना बनाएका हुन् । उनलाई पक्राउ गरि शुक्रबार अदालतमा पेश गरिएको र अदालतले उनलाई थुनामा राखी आवश्यक अनुसन्धान अघि बढाउन आदेश दिएको जनाइएको छ ।

आक्रमणका लागि आवश्यक सामान खरिद गर्न बिहीबार पसल पुगेका बेला उनलाई नियन्त्रणमा लिइएको हो । उनले इस्लामिक स्टेटका तर्फबाट आक्रमण गरी अरुलाई पनि यस्तै किसिमको आक्रमणका लागि उक्साउन खोजेको अभियोग लगाइएको छ ।

आक्रमणका लागि उनले आक्रमणको स्थान निर्धारण गरिसकेको, आक्रमण गर्ने स्थानको आवश्यक अध्ययन गरिसकेको र निकै सावधानीपूर्वक योजना बनाएको अधिकारीले जनाएका छन् । उनले हतियार प्राप्त गर्न र आक्रमण गरिहाल्नमात्र बाँकी रहेको प्रहरीको भनाइ छ ।

उनले आफ्नो योजनाबारे अमेरिकी संघीय अनुसन्धान ब्यूरोका जासुसलाई टेक्स्ट म्यासेजमार्फत् जानकारी दिएका थिए ।

अमेरिकामा पाकिस्तानी मूलका नागरिकहरुले आतंककारी आक्रमणको योजना बनाउँदै आएका छन् । एक साताअघिमात्र एक पाकिस्तानी मूलका अमेरिकीले आतंककारी आक्रमणको षड्यन्त्र रचेको बयान दिएका थिए भने केही महिनाअघि अर्को व्यक्ति तालिबानमा भर्ती हुनका लागि पाकिस्तान जान लागेका बेला पक्राउ परेका थिए ।