काठमाडौं– भारतीय राजदूतावासले ५५ औं भारतीय प्राविधिक तथा आर्थिक सहकार्य (आइटेक)  दिवस मनाएको छ ।

सङ्घीय मामिला तथा सामान्य प्रशासन मन्त्री लालबाबु पण्डितको प्रमुख अतिथ्यमा सम्पन्न कार्यक्रमा नेपालका लागि भारतीय राजदूत मंजीव सिंह पुरी लगायत विभिन्न मन्त्रालयका सचिव, विभागका कर्मचारीहरुको उपस्थिति थियो ।

कार्यक्रममा राजदूत मंजीवसिंह पुरीले नेपाल सरकारका विभिन्न मन्त्रालय तथा विभागका वरिष्ठ अधिकारी एवम् अन्य कर्मचारीहरुलाई भारतका प्रमुख संस्थाहरुमा प्रशिक्षण दिन उक्त आइटेक कार्यक्रमले निर्णायक भूमिका खेलेको बताए ।

नेपाल लगायत १६१ विकासशील राष्ट्रहरुसँग विकासमूलक अनुभव बाँड्न भारत सरकारको सहयोगमा ‘आइटेक कार्यक्रम’ सञ्चालित हुँदै आएको छ । नेपाल सरकारले विभिन्न मन्त्रालय तथा विभागका कर्मचारीहरुको मानव संसाधन विकासका लागि आइटेकका विभिन्न कोर्षहरुको उपयोग गर्दै आएको छ ।

आइटेकका विभिन्न कोर्षमा कम्प्युटर, इन्जिनियरिङ्ग, सूचना प्रविधि, पत्रकारिता, बैंकिङ्ग, कानून निर्माण, उर्जा, रिमोट सेन्सिङ्, जनशक्ति अध्ययन, शिक्षा, महिला सशक्तिकरण, जलविज्ञान, कानून प्रर्वतन, व्यवसाय योजना तथा प्रवर्धन, लेखा र वाणिज्य आदि जस्ता विषयहरु समावेश छन् ।