बर्दिया- बर्दियाको मधुवन नगरपालिका–५ मा ३ महिला एकै पटक बेपत्ता भएका छन् । एक हप्ता अघि गत बुधबार उनीहरु बेपत्ता भएको परिवारको भनाई छ ।

बेपत्ता हुनेमा मधुवन नगरपालिका–५ की १९ वर्षीया सुनिता ओली, १७ वर्षीया विनिता सापकोटा र १५ वर्षीया टीका नेपाली रहेको बर्दिया प्रहरीले जनाएको छ ।

घरबाट एकाएक बुहारी बेपत्ता भएपछि आफन्तकहाँ सोधिखोजी गरेको र नभेटेपछि प्रहरी समक्ष उजुरी दर्ता गराएको विनिताका ससुरा भीमराज सापकोटाले बताए । बेपत्ता भएका विनिता र सुनिता विवाहित हुन । टीका अविवाहित रहेको प्रहरीले जनाएको छ ।

साँझ घरमै रहेकी बुहारी भोलिपल्ट बिहान नभएको भीमराजको भनाई छ । उनीहरुको खोजविनका लागि माइती नेपालमा पनि निवेदन दर्ता गराइएको उनले बताए ।

परिवारले दिएको जाहेरी र हुलियाका आधारमा प्रहरीले खोजिकार्य जारी राखेको इलाका प्रहरी कार्यालय सानोश्रीका प्रहरी निरीक्षक गणेशमान खड्काले बताए ।