काठमाडौं– वैदेशिक रोजगार विभागले विभागमा दर्ता गर्नुपर्ने उजुरीका लिखत मंगलबारदेखि कार्यालय भित्रैबाट निशुल्क तयार गरी दर्ता गरिदिने व्यवस्था शुरु गरेको छ।

वैदेशिक रोजगार विभागका महानिर्देशक भीष्मकुमार भुषालले  सामाजिक सञ्जाल फेसबुकमा लेख्दै उजुरीका लिखत विभागको कार्यालयभित्रबाट निशुल्क दर्ता गरिदिने व्यवस्था गरिएको जानकारी गराएका हुन् ।

महानिर्देशक भुषालले यस व्यवस्थाले  विगतमा उजुरीकर्ताले उजुरीको लिखत तयार गर्न लाग्ने गरेको दुईदेखि पाँच हजारसम्म जोगिने तथा उजुरीका प्रतिवादीसम्म उजुरीको सूचना चुहिने अवस्थाको अन्त्य हुने अपेक्षा लिएका छन् ।

त्यसैगरी उनले श्रम स्वीकृति मिलाइदिन्छु भनी सेवाग्राहीसँग पैसा असूल गर्ने दुईजना दलाललाई पक्राउ गरी थप अनुसन्धानका लागि पठाइएको जनाएका छन् ।