काठमाडौं– महानगरीय प्रहरी कार्यालय रानीपोखरीबाट खटिएको टोलीले काठमाडौंको छाउनीबाट पौने करोड मूल्य बराबरको लागू औषधसहित ६ जनालाई पक्राउ गरेको छ ।

प्रतिग्राम १० हजार रुपैयाँमा बिक्री हुने मेथामफेटामाइन नामक लागू औषधसहित ६ जनालाई पक्राउ गरेको हो । हेर्दा सेतो (बरफजस्तो) देखिने  यो लागू औषधलाई (आइस ड्रग्स) समेत भनिन्छ ।

छाउनीस्थित द फूड हेभन नामक क्याफेमा छापा मारेर प्रहरीले लागू औषधसहित ६ जनालाई पक्राउ गरेको हो ।

प्रहरीका अनुसार क्याफेबाट करिब ७३४ ग्राम मेथामफेटामाइन ड्रग्स बरामद भएको छ । उक्त ड्रग्सको नेपाली बजारमूल्य ७३ लाख हुनआउने प्रहरीको भनाइ छ ।

ड्रग्सबारे प्रहरीको लागू औषध नियन्त्रण ब्यूरोले थप अनुसन्धान गरिरहेको जनाइएको छ ।

विशेष सूचनाको आधारमा क्याफेमा छापा मारेको प्रहरीले लागू औषध खरिद गर्न पुगेका तथा सेवनाकर्ता गरी ६ जनालाई पक्राउ गरेको हो ।

उनीहरुको साथबाट ९ थान मोबाइल तथा १ लाख ७७ हजार रुपैयाँ नगद पनि बरामद भएको प्रहरीले जनाएको छ ।