पोखरा– पोखरामा वर्षेनी आयोजना हुँदै आएको ‘सफल पोखरा अन्तर्राष्ट्रिय म्याराथन’को पुरस्कार राशिमा दोब्बर वृद्धि गरिएको छ । भूतपूर्व खेलाडी मञ्च नेपालले आयोजना गर्दै आएको म्याराथनमा विगतमा विजेतालाई १ लाख दिने गरिएकोमा यस वर्षबाट विजेतालाई २ लाख पुरस्कार प्रदान गरिने सोमबार आयोजित पत्रकार सम्मेलनमा जानकारी दिइयो । प्रतियोगितामा द्वितीय, तृतीय र सान्त्वनालाई क्रमशः १ लाख, ७५ हजार र  १५ हजार पुरस्कार प्रदान गरिनेछ ।

दक्षिण एशियाली मुलुकबाट व्यावसायिक धावकको सहभागिता वृद्धि गर्ने उद्देश्यले पुरस्कार राशिमा वृद्धि गरिएको संस्थाका अध्यक्ष तेजबहादुर गुरुङले जानकारी दिए । प्रतियोगिताले पोखरामा खेल पर्यटनको प्रवर्द्धन तथा नेपाल भ्रमण वर्ष २०२० सघाउने पनि अध्यक्ष गुरुङको भनाइ छ ।

प्रतियोगितामा पुरुष तथा महिला १० किमी दौडमा प्रथम, द्वितीय र तृतीयलाई क्रमशः  १५, १० र ५ हजार प्रदान गरिनेछ ।

पाँच किमी छात्र/छात्रा दौडमा प्रथम, द्वितीय र तृतीयलाई क्रमशः १० हजार, ७ हजार र ४ हजार दिइनेछ । ह्विलचियर पुरुष तथा महिला र दृष्टिविहीन पुरुष तथा महिला दौडमा प्रथम, द्वितीय र तृतीयलाई ५, ३ र २ हजार पुरस्कार प्रदान गरिने आयोजकले जनाएको छ ।