काठमाडौं– कृषि विकास बैंक ह्याकिङ काण्डमा बैंकको लहान शाखाका कर्जा शाखा प्रमुख सुनीलकुमार साहलाई पक्राउ गरिएको छ ।

४ करोड ७३ लाख ९६ हजार रुपैयाँ लुटिएको प्रकरणमा कर्जा शाखाका साहलाई प्रहरीले अनुसन्धानका लागि लहानबाट आइतबार पक्राउ गरेको हो । बैंककै कर्मचारीको संलग्नता हुनसक्ने भन्दै उनलाई अनुसन्धानका लागि पक्राउ गरिएको स्रोतले बतायो ।

बैंकको रकम कर्मचारीकै युजर आइडीबाट लुटिएको पाइएपछि उनी शंकाको घेरामा तानिएका हुन् । लहान शाखाबाट काठमाडौंमा ट्रान्सफर गरिएको उक्त रकम ह्याकरले लुटेको तथ्य खुलेको थियो ।

यसअघि प्रहरीले गत शुक्रबार महेन्द्र भट्ट, मालतीदेवी न्यौपाने भट्टराई र गणेश बस्याललाई पक्राउ गरेको थियो । योसँगै बैंक ह्याक प्रकरणमा पक्राउ पर्नेको संख्या १७ पुगेको छ ।

कृषि विकास बैंकबाट ह्याकरले ४ करोड ७३ लाख ९६ हजार रुपैयाँ ह्याक गरेर व्यक्तिको खातामा ट्रान्सफर गरेका थिए ।