काठमाडौं – हरेक फिल्ममा चरित्र अनुसारको भूमिकामा प्रस्तुत हुन खोज्ने नायिका सुरक्षा पन्तले चलचित्र ‘आमा’ का लागि कपाल मुण्डन गरेकी छिन् । यो चलचित्रलाई दीपेन्द्र के. खनालले निर्देशन गरिरहेका छन् ।

सुरक्षाका अनुसार चलचित्रका केही दृश्यमा कपाल मुण्डन गर्नुपर्ने दृश्य छन् । ती दृश्यमा आफूलाई वास्तविक देखाउन सकियोस् भनेर कपाल काटेको उनले बताइन् । उनको नयाँ लूकलाई फ्यानले सप्रराइज रुपमा लिएका छन् ।

पछिल्लो समय रिलिज भएको चलचित्र ‘घर’ मा सुरक्षाले एक विवाहित महिलाको भूमिका निभाएकी थिइन् । उनको भूमिकालाई लिएर धेरैले तारिफ गरेका थिए । यद्यपि फिल्म चलेन ।

जबकि, नेपालमा कलाकारले चरित्रमा खासै ध्यान दिएको पाइँदैन ।

निर्देशक दीपेन्द्र के. खनालको ड्रिम प्रोजेक्ट समेत रहेको यो फिल्मलाई सक्दो वास्तविक बनाउन खोजिएको निर्माण टिमले जनाएको छ । चलचित्रमा मिथिला शर्मा, सरिता गिरी लगायतका कलाकारको पनि अभिनय रहनेछ ।

रिलिजअघि राम्रो चर्चामा रहेको यो फिल्म आमाको स्नेहमा आधारित छ । निर्माण टिमका अनुसार यो फिल्म फागुन ९ गतेदेखि प्रदर्शनमा आउँदैछ ।