काठमाडौं– सत्तारुढ दल नेपाल कम्युनिष्ट पार्टी (नेकपा) को सचिवालय बैठक विना निष्कर्ष टुंगिएको छ । स्कूल विभागको जिम्मेवारी बाँडफाँडमा कुरा नमिलेपछि सोमबार दिउँसो बसेको सचिवालय बैठक विनानिष्कर्ष सकिएको हो ।

गत साउन ५ गते बसेको सचिवालय बैठकले देशभरका ७७ वटै जिल्ला कमिटीका इन्चार्ज र सह–इन्चार्जको नाम टुङ्ग्याएको थियो ।

यसअघि पार्टी स्कूल विभागको नेतृत्वमा सहमति नजुटेपछि आइतबार बस्ने भनिएको नेकपा बैठक सोमबारका लागि बोलाइएको थियो । स्कूल विभागको नेतृत्वमा विवाद देखिएपछि सचिवालय बैठक पटक–पटक स्थगित हुँदै आएको छ ।

स्कूल विभागमा प्रवक्ता नारायणकाजी श्रेष्ठ र सचिवालय सदस्य ईश्वर पोखरेलले दाबी गर्दै आएका छन्। त्यस्तै, स्थायी समितिबाट घनश्याम भुसाल र वेदुराम भुसालले पनि आफ्नो दाबी प्रस्तुत गरिरहेका छन्।

स्कूल विभागको नेतृत्वलाई लिएर तत्कालीन एमाले तर्फका ओली पक्ष र तत्कालीन माओवादी पक्षका बीचमा आआफ्नो समूहका नेतालाई नेतृत्व दिलाउन रस्साकस्सी चलेपछि सचिवालय बैठक प्रभावित बन्दै आएको छ ।