काठमाडौं – सरकारले आगामी आर्थिक वर्षमा चलचित्र क्षेत्रलाई प्राथमिकतामा नराखे पनि ‘छायांकनका लागि नेपाल’ नामक कार्यक्रमको शुरुवात गर्ने जनाएको छ ।

अर्थमन्त्री डा. युवराज खतिवडाले वर्ष २०७६/७७ को बजेट विनियोजनका क्रममा आगामी वर्षलाई ‘छायांकनका लागि नेपाल’ का रुपमा शुरुवात गर्ने बताए ।

यस्तै बजेटमा काठमाडौं उपत्यकामा अत्याधुनिक सुविधासम्पन्न स्टुडियो निर्माण प्रारम्भ गरिने जनाइएको छ । सरकारले श्रमजिवी चलचित्रकर्मीलाई सामाजिक सुरक्षाको दायरामा ल्याउने पनि जनाएको छ ।

लामो समयदेखि बहसको विषय बनेको बक्स अफिसका लागि भने कुनै बजेट छुट्याएको छैन । गतवर्ष बक्स अफिसमका लागि सरकारले बजेट छुट्याए पनि हालसम्म पनि बक्स अफिस पूर्ण रुपमा लागू हुन सकेको छैन ।

यस्तै सरकारले कलाकार तथा साहित्यकारको वृत्ति विकासमा ध्यान दिने पनि बताइएको छ ।