काठमाडौं– अर्धभूमिगत नेपाल कम्युनिस्ट पार्टी (मसाल) ले पोलिटब्युरो सदस्य गोविन्दसिंह थापामाथि कारवाही गरेको छ ।

पार्टीको मुखपत्रको रुपमा रहेको हाँक साप्ताहिकका विषयमा भएको विवादपछि पार्टीले उनलाई साधारण सदस्यसमेत नरहने गरी निश्कासन गरेको वक्तव्यमा उल्लेख छ ।

यही भदौ ५ गते बसेको पोलिटब्युरो बैठकले थापालाई निश्कासन गरेको हो ।

हाँक साप्ताहिकका संस्थापक प्रधानसम्पादकसमेत रहेका थापा मसालका महामन्त्री मोहनविक्रम सिंहका मामा हुन् । महामन्त्री सिंहले आफ्नै मामाविरुद्ध गरेको कारवाहीलाई लिएर पार्टीभित्र अनुशासनको विषयले चर्चा पाएको छ ।

गुल्मी पुख्र्यौली घर भएका थापा विगत ५ दशकदेखि निरन्तर पार्टीको नेतृत्वमा थिए । हाँक साप्ताहिकको स्वामित्वलाई लिएर मसालमा विवाद थियो । मसालको मुखपत्र मानिने सो पत्रिका थापाको नाममा दर्ता थियो । पछिल्लो समय मसालभित्र कृष्ण पौडेललगायतका नेताहरुसँगै थापा पनि असन्तुष्ट समूहमा थिए ।

पञ्चायतकालमा व्यक्तिको नाममा दर्ता गर्नुपर्ने भएकाले पार्टीको मुखपत्र हाँक थापाका नाममा दर्ता गरिएको हुनाले नामसारी गरिदिन पार्टीले गरेको आग्रह थापाले नमानेको आरोप लगाउँदै उनलाई कारवाही गरिएको पार्टीद्वारा जारी वक्तव्यमा उल्लेख छ । यसअघि गायक जीवन शर्मालाई पार्टीले कारवाही गरिसकेको छ ।