काठमाडौं– वैदेशिक रोजगारीमा तुर्किमिनिस्तान पठाइदिन्छु भन्दै ठगी गरेर फरार भएका एक जनालाई प्रहरी पक्राउ गरेको छ ।

रामेछापको गंगा गाउँपालिका ३ का ३४ वर्षीय हर्कबहादुर तामाङलाई काठमाडौंको जोरपाटीबाट पक्राउ गरिएको अपराध अनुसन्धान महाशाखाले जानकारी दिएको छ ।

तामाङले भोजपुर पौवादुम्मा गाउँपालिका ६ का उमेशकुमार तामाङलाई तुर्किमिनिस्तानमा सुरक्षा गार्डमा पठाइदिने भन्दै ३ लाख ठगी गरेको प्रहरीले जानकारी दिएको छ ।

मासिक १ हजार २ सय डलर तलब, खान बस्नसमेत कम्पनीले नै दिने प्रलोभन देखाई नक्कली टिकटसमेत बनाएर ठगी गरेको प्रहरी अनुसन्धानबाट खुलेको छ ।

उनले अन्य चार जनालाई पनि तीन लाख रुपैयाँका दरले ठगेको प्रारम्भिक अनुसन्धानबाट खुलेको महाशाखाले जनाएको छ ।