काठमाडौं– कृषि विकास बैंक ह्याकिङ प्रकरणमा थप ३ जना पक्राउ परेका छन् ।

महानगरीय अपराध महाशाखाका प्रमुख एसएसपी सहकुल थापाले काठमाडौं, कञ्चनपुर र पर्वतबाट गरी थप ३ जनालाई पक्राउ गरिएको बताए ।

थापाका अनुसार काठमाडौंबाट गणेशप्रसाद बस्याल, कञ्चनपुरबाट यज्ञराज भट्ट र पर्वतबाट मालतीदेवी न्यौपाने पक्राउ परेका हुन् ।

पक्राउ परेकामध्ये कञ्चनपुरका यज्ञराज भट्टको खातामा ४५ लाख रुपैयाँ पठाइएको पाइएको एसएपी थापाले बताए । यस्तै, पर्वतबाट पक्राउ परेकी न्यौपानेको खातामा २८ लाख रुपैयाँ ट्रान्सफर भएको देखिएको छ ।

कृषि विकास बैंक ह्याकिङ प्रकरणमा थप ३ सहित अहिलेसम्म १६ जना पक्राउ गरिसकेको छ ।

प्रहरीले बुधबार पत्रकार सम्मेलन गरी कृषि विकास बैंक प्रकरणको ह्याकिङमा संलग्न १२ जना पक्राउ परेका जानकारी दिएको थियो ।

बिहीबार मात्रै प्रहरीले स्याङ्जाबाट थप १ जनालाई पक्राउ गरेको थियो ।

कृषि विकास बैंक ह्याकिङ प्रकरणमा पक्राउ पर्नेको संख्या अझै बढ्न सक्ने अपराध महाशाखाका प्रमुख थापाको भनाइ छ ।

थापाका अनुसार कृषि विकास बैंकको आन्तरिक प्रणाली ह्याक गरी विभिन्न व्यक्तिको खातामा रकम पठाइएको छ । यसअघि ८ जना व्यक्तिको बैंक खातामा मात्रै रकम पठाइएको देखिए पनि अनुसन्धानका क्रममा अन्य व्यक्तिको खातामा पनि रकम गएको देखिएको एसएसपी थापाले बताए ।

‘कृषि विकास बैंकबाट एउटा व्यक्तिको खातामा गएको रकम उक्त व्यक्तिको खाता हुँदै अर्को व्यक्तिसम्म पुगेको देखिन्छ,’ एसएसपी थापाले भने, ‘यसरी हेर्दा यो ह्याकिङमा अझै धेरै जना संलग्न रहेको देखिन्छ । अनुसन्धान जारी छ । अन्य व्यक्ति पनि पक्राउ पर्न सक्छन् ।’