काठमाडौं– प्रधानन्यायाधीश चोलेन्द्र शम्शेर राणाले अदालतले गरेका फैसलामाथि प्रश्न नउठाउन भन्दै सम्बद्ध पक्षको ध्यानाकर्षण गराएका छन् ।

पछिल्लो समय एनसेल लाभकर प्रकरणमा सर्वोच्चद्वारा भएको फैसालामाथि संसदमै प्रश्न उठेपछि प्रधानन्यायाधीश राणाले असम्बद्ध व्यक्ति तथा निकायबाट अदालतका फैसला तथा आदेशको परीक्षण गर्न खोजिनु मान्यता विपरित भएको बताए ।

दशैं, तिहार तथा छठ पर्वको अवसर पारेर शुक्रबार आयोजना गरिएको शुभकामना आदान प्रदान कार्यक्रममा बोल्दै प्रधानन्यायाधीश राणाले संविधान तथा कानूनले अपेक्षा गरेअनुसारको भूमिका र जिम्मेवारी निर्वाह गर्न न्यायपालिका सदैव क्रियाशील हुँदै आएको पनि स्मरण गराए ।

‘स्वतन्त्र, निष्पक्ष र सक्षम न्यायपालिकाबाट न्याय सम्पादनको रोहमा भएका फैसला वा आदेशहरुको विधिपूर्वक परीक्षण हुन सक्दछ । तर, असम्वद्ध व्यक्ति, निकाय वा प्रक्रियाबाट परीक्षण गर्ने कार्य आफैमा स्वतन्त्र न्यायपालिकाको अवधारणा र मूल्य मान्यता विपरित हुन जान्छ,’ प्रधानन्यायाधीश राणाले भने, ‘यसले न्यायपालिकाप्रतिको विश्वसनीयतामा प्रश्न उठ्न जाने र नेपालको संविधानले परिकल्पना गरेको सक्षम र सुदृढ न्यायपालिकाको स्थापनामा सहयोग पुग्दैन ।’

प्रधानन्यायाधीश राणाले योजनावद्ध व्यवस्थापनको माध्यमबाट न्यायिक सुधारका प्रक्रियाहरुलाई अगाडि बढाउने उद्देश्यका साथ न्यायपालिकाको चौथौ पञ्चवर्षीय योजना लागू गरिएको पनि जानकारी दिए ।