काठमाडौं – इंग्ल्यान्डमा जारी १२ औं संस्करणको आईसीसी एकदिवसीय विश्वकप क्रिकेटमा आज (बिहीबार) भारत र क्यारेबियन टोली वेष्ट इन्डिजबीचको खेल हुँदैछ । म्यान्चेस्टरस्थित ओल्ड ट्रार्फोडमा हुने खेल नेपाली समय अनुसार सबा ३ बजे शुरु हुनेछ । विश्वकपको उपाधि दाबेदार टोली भारतसामू आजको खेलमा इन्डिजको परीक्षाका रुपमा हेरिएको छ ।

यसअघि खेलेका ५ खेलमा ४ जीत र एक खेल बर्षाका कारणले प्रभावित हुँदा बराबरी खेल्दै ९ अंक जोडेको छ भने ६ खेलमा १ जीत र ४ खेलमा हार व्येहोरेको इन्डिज टोलीले एक खेलमा वर्षाले खेल प्रभावित भएपछि अंक बाड्दा ३ अंकमात्रै जोड्न सकेको छ ।

आजको खेलमा विश्वकपमा बलियो रुपमा देखिएको भारतलाई रोक्न कमजोर हुँदै गएको इन्डिजको परीक्षाका रुपमा हेरिएको छ ।

यता, भारत आफुलाई विश्वकपमा अपराजित राख्ने लक्ष्यमा छ । यसअघि न्युजिल्यान्डविरुद्धको खेलमा कार्लोस बर्थबेटले उत्कृष्ट ब्याटिङ गर्दै इनिङ्स सम्हाले पनि ५ रनको हार व्यहोरेको इन्डिज टोली भारतविरुद्ध जीतको खोजिमा छ ।

भारतका लागि कप्तान विराट कोहलीसहित ओपनिङ ब्याट्सम्यान रोहित शर्माले पनि भारतका लागि उत्कृष्ट प्रदर्शन पस्किदै आएका छन् । यता, इन्डिजका लागि ओपनिङ तथा ‘युनिर्भसल बोस’ क्रिस गेलदेखि निकोलास पुरान, कार्लोस बार्थबेट लगायतका खेलाडीले उतकृष्ट प्रदर्शन गर्दै आएका छन् ।