लस एन्जल्स– रेम्बो चलचित्रमा मुख्य भूमिकामा रहेका हलिउड सुपस्टार सेल्भिष्टर स्टालोन गाडी पार्किङ्गको विषयमा एकजना महिलासँग चर्को वादविवादमा उत्रिएका छन् ।

शुक्रबार क्यालिफोर्निया राज्यको लस एन्जल्स शहरमा स्टालोनले पार्क गर्न चाहेको स्थानमा अर्कैं महिलाले लगेर गाडी पार्क गरेपछि रिसले मुर्मुरिएका स्टालोन ती महिलासँग सिधैं विवादमा उत्रिएका हुन् ।

आफूले पार्क गर्न चाहेको स्थानमा अर्कैले गाडी पार्क गरेको थाहा पाएर स्टालोन दायाँ बायाँ नहेरी सिधै त्यस गाडी नजिक गएर चर्को स्वरमा कराएका थिए । त्यसपछि गाडी पार्क गर्ने ती महिलाका निजी ड्राइभरसँग उनको भनाभन समेत भएको थियो ।

त्यसपछि ती महिलाले खैरो रंगको ट्राकसुटमा वलिष्ठ देखिएका स्टालोनसँग बहस गर्न नसकेर हिड्नु परेको हलिउडका समाचारमा आएका छन् । त्यसपछि स्टालोनले आफ्नो मर्सिडिज कार आफूले चाहेको ठाउँमा लगेर पार्क गरेका थिए ।

हलिउडको निकै नै लोकप्रिय रेम्बो चलचित्र सिरिजको मुख्य भूमिकामा रहेका स्टालोनको चलचित्र रेम्बोको अन्तिम पार्ट रेम्बो ः द लाष्ट ब्लड आगामी सेप्टेम्बर २० मा रिलिज हुँदैछ ।

उनी सर्वप्रथम सन् १९८२ मा रेम्बो चलचित्रको पहिलो पार्ट रेम्बो ः फष्ट ब्लडमा जोन रेम्बोको भूमिकामा देखिएका थिए ।