काठमाडौं – सिनेमा घरमा नेपाली फिल्म नचलेको धेरै भयो । पछिल्लो समय कबड्डी ३ र छ माया छपक्कैले व्यावसायिक सफलता हात पारे । यीबाहेक अन्य फिल्मले व्यापारमा सफलता हात पार्न सकेनन् ।

यस वर्ष अब ठूला फिल्म खासै छैनन् । यद्यपि प्रदीप खड्काको फिल्म ‘प्रेम गीत ३’ लाई प्रतीक्षित फिल्मका रुपमा हेरिएको छ । यसअघि २ सिरिज सफल भएका कारण पनि ‘प्रेम गीत ३’ प्रतीक्षित बनेको छ ।

यो फिल्म चैत २८ मा आउने घोषणा गरेर निर्माण टिम यतिबेला मनाङको चिसोमा फिल्मको छायांकन गरिरहेको छ । यो मितिमा ‘चपली हाइट ३’ पनि प्रदर्शन हुने चर्चा छ । त्यसो त सोही मितिमा अनमोल केसीको एक फिल्म प्रदर्शन गरिने चर्चा थियो ।

हलवाला तथा वितरकले पनि अनमोल र प्रदीपलाई भिडाउन खोजिरहेका थिए । तर, अनमोलले फिल्ममा काम गरेनन् । उनले हालै फिल्म ‘धुपौरे’ रिजेक्ट गरेका थिए ।

अब कुरा गरौँ, यतिबेला हलमा दर्शक नभएको विषयबारे ।

पछिल्लो समय दर्शक मल्टिप्लेक्स (सुविधासम्पन्न सिनेमा हल) तर्फ आर्कषित भए पनि यी हलमा नेपाली फिल्म हेर्ने दर्शक न्यून मात्रामा जाने गर्छन् ।

अहिले मल्टिप्लेक्स हलमा कुनै पनि नेपाली सिनेमाले राम्रो व्यापार गर्न सकेका छैनन् । हलमा नेपाली दर्शकको खडेरी लागिरहेका बेला विदेशी फिल्म भने चलिरहेका छन् ।

यता मेकरले अहिले कुनै फिल्म रिलिज नगरी दशैँ र नयाँ वर्ष ताक्दै फिल्म रिलिज गर्न हानथाप गरिरहेका छन् ।

स्किृप्टसमेत फाइनल नहुँदै अर्को वर्षको कार्तिक ७ गते प्रदीप भट्टराईले मह जोडीसँग मिलेर नयाँ फिल्म रिलिज गर्ने घोषणा गरेका थिए । अब सोही मितिमा फेरि अर्को फिल्म पनि घोषणा गरिएको छ ।

दीपकराज गिरीको टिमले आफ्नो नयाँ प्रोजेक्ट ‘छक्का पञ्जा ४’ निर्माण गर्ने र यसलाई दशैँको अवसर पारेर रिलिज गर्ने घोषणा गरेको छ ।

यदि दुवै फिल्म युनिटले आफ्नो अडान छोडेनन् र रिलिज गरे भने आगामी वर्षका दुई ठूला फिल्म एकसाथ रिलिज हुने भएका छन् ।

जबकि, दुवै मेकरले यसअघि सहकार्य गरेर एउटै फिल्म बनाएका थिए । अब दुई मेकर एकसाथ फरक फिल्ममा आउने भएपछि फिल्म जगतमा तरंग मच्चिएको छ ।

यद्यपि अहिले घोषणा गर्दैमा फिल्म एकसाथ रिलिज हुन्छ भन्ने छैन । रिलिजका बेला दुई टिम मिलेर जान्छन् कि भिड्न तयार हुन्छन्, त्यो भने हेर्न बाँकी छ ।

एकसाथ दुई कमेडी फिल्म रिलिज हुँदा दर्शकलाई त रोजेर फिल्म हेर्ने मौका जुर्ला तर निर्माताका लागि त पक्कै घाटाको व्यापार न हो ।