काठमाडौं- वैदेशिक रोजगार बोर्डले गत आर्थिक वर्ष वैदेशिक रोजगारीका क्रममा मृत्यु भएका ७ सय ५३ जना कामदारका परिवारलाई ४८ करोड रुपैयाँ आर्थिक सहायता प्रदान गरेको छ । बोर्डले मृतक २३ महिला र ७ सय ३० पुरुष कामदारका परिवारलाई ४८ करोड ४९ लाख ४० हजार रुपैयाँ प्रदान गरेको जनाएको छ ।

बोर्डले अंगभंग तथा बिरामी ३ सय ३५ कामदारलाई ९ करोड १४ लाख १३ हजार ६ सय ९९ रुपैयाँ आर्थिक सहायता दिएको जानकारी दिएको छ । गत आर्थिक वर्ष १२ महिला र ३ सय २३ पुरुष कामदारले सहयोग पाएका छन् । बोर्डले बिरामीको प्रकृति र मात्राका आधारमा आर्थिक सहायता दिदै आएको छ ।

वैदेशिक रोजगारीका क्रममा करार अवधि भित्रै मृत्यु भएमा मृतक कामदारका आश्रित परिवारले ७ लाखका दरले आर्थिक सहायता पाउँदै आएका छन् । बोर्डले वैदेशिक रोजगारकिा क्रममा विभिन्न कारणले अलपत्र परेका ७८ नेपाली कामदारलाई ६ करोड ५६ लाख पाँच हजार ५ सय ५४ खर्च गरी उद्दार गरेको र ज्यान गुमाएका ८२ नेपाली कामदारको शव नेपाल झिकाएको आर्थिक सहायता दिएको जनाएको छ ।

सरकारले मृतक वा अंगभंग हुनेहरुका सहायताका लागि कामदार कल्याणकारी कोष स्थापना गरेको छ । संकलित सोहि रकमबाट वैदेशिक रोजगार बोर्डले मृतक, गम्भीर बिरामी र अंगभंग भएकाहरुका लागि सहायता उपलब्ध गराउने छ ।

खाडीका देश र मलेसियामा जाने कामदारले एक हजार पाँच सय रुपैयाँ कोषका लागि बुझाउनु पर्छ भने दक्षिण कोरिया, जापान, इजरायल, अमेरिका र युरोपका देशमा जाने युवाहरुले दुई हजार पाँच सय रुपैयाँ कल्याणकारी कोषका लागि जम्मा गर्नुपर्छ । कामदार कल्याणकारी कोषमा चार अर्बभन्दा बढी रकम जम्मा भएको छ ।