काठमाडौं–रात्रिकालिन क्षेत्रमा काम गर्ने श्रमिक सरकारले तोकेको न्यूनतम पारिश्रमिक पाउनबाट बञ्चित रहेको महिला तथा बालबालिका बेचबिखन विरुद्ध सहकर्मी समुह नेपाल (एटविन)को एक अध्ययनले देखाएको छ ।

नेपालभित्र आन्तरिक श्रम बजारमा काम गर्ने श्रमिकमध्ये धेरै सरकारले तोकेको न्यूनतम पारिश्रमिक नपाउने गरेको एटविनले जनाएको छ । आन्तरिक श्रम बजारमा काम गर्ने महिला श्रमिक धेरै हिंसामा परेपनि उनीहरु समस्या लिएर राज्यको संयन्त्रसम्म नआउने गरेको एटविनको अध्ययनमा उल्लेख छ ।

सरकारले वैदेशिक रोजगारीका क्रममा समस्यामा परेर र विदेशीमा अलपत्र भएका श्रमिकप्रति केन्द्रीत भएर काम गर्दा आन्तरिक श्रम बजारका समस्या ओझेलमा परेको एटविनकी अध्यक्ष नातिसरा राईले बताइन् ।

मानव बेचबिखनविरुद्ध प्रहरीले अभियान नै चलाइरहेको मानव बेचबिखन अनुसन्धानका डिएसपी राजकुमार सिलवालले बताएका छन् । प्रहरी मानव बेचबिखन रोक्न गम्भीर भएर काम गरिरहेको उनको भनाइ छ ।

नेपालमा वार्षिक १२ हजार महिला तथा बालबालिका बेचबिखनमा पर्ने गरेको एटविनको अध्ययनमा उल्लेख गरिएको छ । यस्तै आन्तरिक रोजगार, वैदेशिक रोजगारी र गरिबीका कारण धेरै महिला तथा बालबालिका मानव बेचबिखनको जोखिममा रहेको एटविनले जनाएको छ ।