काठमाडौं- योगदानमा आधारित सामाजिक सुरक्षा कोषबाट योगदान गरेबापत २ जनाले सुविधा लिएका छन् । गत वर्षदेखि कोषमा योगदान गरेबापत मृतकको आश्रित परिवारलाई कोष‍ले निवृत्तिभरण वापतको सुविधा प्रदान गरेको हो ।

क्लोजर सिष्टम ईण्टरनेशनल नेपालीमा कार्यरत ईञ्जिनियर रुपेन्द्र थापा र कैरोश क्याफेमा कार्यरत प्रकाश तामाङको सडक दुर्घटनामा मृत्यु भएपछि उनीहरुको परिवारलाई आश्रित परिवार सुरक्षा योजना अन्तर्गत प्रति परिवार रु २५ हजार तथा मासिक निवृत्तिभरण वापतको सुविधा प्रदान गर्न थालिको कोषले जानकारी दिएको छ ।

कोषका कार्यकारी निर्देशक कपिल ज्ञवालीका अनुसार योगदान गरेका दुई जनाले सेवा सुविधा पाउन थालेको जानकारी दिए । आधारभूत तलव अनुसार नै यो सुविधा दिइने भएका कारण आश्रित परिवारले प्राप्त गर्ने रकम पनि फरक पर्ने कार्यकारी निर्देशक ज्ञवालीले बताए ।

कोषका अनुसार आश्रित परिवार सुरक्षा योजनाअन्तर्गत आधारभूत पारिश्रमिकको ६० प्रतिशत रकम निजको आश्रितलाई प्रदान गर्ने व्यवस्था छ ।

सो व्यवस्थाअनुसार थापाकी श्रीमतीले मासिक १७ हजार १ सय आजिवन पाँउछिन् । तामाङका परिवारले मासिक १० हजार २ सय प्राप्त गर्नेछन् । यसैगरी निजहरुले जम्मा गरेको योगदान रकम मध्ये वृद्धावस्था सुरक्षा योजना अन्तर्गतको संकलित रकम तथा प्रतिफल पनि थापा र तामाङका परिवारलाई प्रदान गर्ने प्रक्रिया अगाडी बढिसकेको कोषले जनाएको छ ।