काठमाडौं । सरकारले ओमनसँग नयाँ श्रम सम्झौताको तयारी थालेको छ । सम्झौता तथा समझदारीमा सहमति जुटाउन सरकारी टोली शनिबार त्यसतर्फ जाँदैछ ।

टोलीले आइतबार र सोमबार ओमनसँग छलफल गर्नेछ । छलफलका क्रममा यसअघि ओमनले करिब तीन महिनाअघि पठाएको एमओयुको मस्यौदामा नेपालले तयार गरेको प्रस्ताव पेश गरिने जनाइएको छ । टोलीका संयोजक एवम् श्रम मन्त्रालयका सहसचिव रामप्रसाद घिमिरेले भन्नुभयो, ‘श्रम सम्झौताका लागि पहिलो जोड रहने र त्यो सम्भव नभए श्रमिकहरुलाई व्ययभार र ठगीमा नपर्ने गरी एमओयूका लागि वार्ता हुन्छ ।’

सहमति कायम भएको खण्डमा निकट भविष्यमै श्रम सम्झौता तथा समझदारीमा हस्ताक्षर हुने मन्त्रालयले जनाएको छ । ओमनपछि यसअघिको सम्झौता नवीकरणका लागि टोली मंगलबार युएई जानेछ । समाचार आजको नयाँ पत्रिकामा प्रकाशित छ ।