काठमाडौं– श्रम, रोजगार तथा सामाजिक सुरक्षामन्त्री गोकर्ण विष्टले नेपाली श्रमिकलाई सुरक्षित र व्यवस्थित काम गर्न जापान सरकारसँग श्रम सम्झौतामा हस्ताक्षर भएको बताएका छन् । उनले जापान नेपाली कामदारका लागि सुरक्षित र आकर्षक गन्तव्य बन्ने दाबी गरे ।

आज (सोमबार) दुई देशका अधिकारीबीच भएको श्रम सम्झौतापछि आफ्नो धारणा राख्दै मन्त्री विष्टले विगत लामो समयको नेपाल जापानको घनिष्ट सम्बन्ध अब श्रम र रोजगारीका क्षेत्रमा पनि पुगेको बताए ।

श्रम सम्झौता गरेर नेपाली कामदार लैजाने विषयमा लामो समयदेखि छलफल भएको बताउँदै मन्त्री विष्टले त्यो छलफलको निर्णायक दिन आज भएको बताए ।
जापानले कृषि, उद्योग, पर्यटनलगायतका १४ क्षेत्रमा काम गर्ने दक्ष कामदार लैजाने ९ देशको सूचीमा नेपाल अग्रभागमा पर्नु सुखद कुरा रहेको मन्त्री विष्टले बताए ।

नेपाली कामदारलाई जापान लैजान नेपालका लागि जापानका राजदूत मासमिजी साइगोले खेलेको भूमिका उल्लेख्य र प्रसंशनीय रहेको मन्त्री विष्टले बताए ।