काठमाडौं – रिलिजको दुई दिनअघि चलचित्र ‘घामड शेरे’ को रिलिज मितिमा हेरेफेर गरिएको छ । निर्माण टिमले हल सञ्चालकहरुले पर्याप्त शो नदिँदा रिलिज मिति सार्नुपरेको बताएका छन् ।

यसअघि चलचित्र ‘घामड शेरे’ दशैँमा रिलिज हुने चर्चा थियो । पछि फिल्म कार्तिक ८ गते रिलिज हुने फाइनल भएको थियो । दशैँमा पनि फिल्म धेरै जुध्ने भएपछि सरेको यो फिल्म अब फेरि कार्तिक २२ मा पुगेको हो ।

फिल्मका अभिनेता निश्चल बस्नेतले सामाजिक सञ्जालमा रोष प्रकट गर्दै लेखेका छन्, ‘कृपया मेरो अगाडि चाहिँ नेपाली फिल्मको प्रगतिका लागि हामी काम गरिरहेका छौँ भन्ने शब्द अहिलेका वितरक, हलवाला साहूहरुले र राम्रो चिनजान भएका केही चलचित्रकर्मीहरुले मसँग नगर्नुहोला ।’

उनले आफ्नो फिल्म रिलिजभन्दा अघि नै ‘फेल’ भएको पनि लेखेका छन् । उनले लेखेका छन्, ‘यसपटक मैले सोचेँ कि, भोलि मेरा फिल्म कसरी रिलिज गर्छु ।’

यस्तै वितरक तथा फिल्ममेकर प्रचण्ड श्रेष्ठले आफूहरुको उत्साह र अपेक्षासँग मेल नखाने ‘शो’ हलले दिँदा चलचित्र दुई हप्ता पछाडि सारेको बताएका छन् ।

‘चलचित्र घामड शेरेलाई लिएर हामीभित्र जुन उत्साह र अपेक्षा थियो, त्यो उत्साह र अपेक्षासँग मेल नखाने शो मात्र उपलब्ध हुँदा चलचित्रलाई दुई हप्तापछि सार्ने निर्णय गरेका छौँ,’ उनको भनाइ छ, ‘हामीलाई विश्वास गर्नुहुने सम्पूर्ण दर्शकहरु, अहोरात्र खटिएका चलचित्रका कलाकार तथा प्राविधिकहरु र निर्माताहरुलाई पर्न गएको असुविधाप्रति क्षमाप्रार्थी छौँ ।’

निश्चल बस्नेत र स्वस्तिमा खड्काको शीर्ष भूमिका रहेको ‘घामड शेरे’ लाई हेमराज बिसीले निर्देशन गरेका हुन् । बिसीकै निर्माण तथा लेखन रहेको यो फिल्म रिलिजअघि राम्रो चर्चामा छ ।

हिन्दी चलचित्र ‘हाउसफूल ४’ प्रदर्शनमा आएको छ । सो फिल्मले मल्टिप्लेक्स हलमा बढी शो र नेपाली चलचित्रले कम शो पाएपछि ‘घामड शेरे’ दुई हप्तापछाडि सरेको हो ।