काठमाडौं– संयुक्त अरब इमिरेट्स (यूएइ )विरुद्ध हुने तीन अन्तर्राष्ट्रिय एकदिवसीय र तीन टि–२० अन्तर्राष्ट्रिय सिरिज खेल्न नेपाली टोली यतिबेला दुबइमा छ । शुक्रबारबाट खेल शुरु हुनेछन् । खेलका लागि नेपाली टोली अभ्यासमा व्यस्त बनेको छ ।

नेपालले माघ ११, १२ र १४ गते एकदिवसीय खेल खेल्दैछ। यस्तै माघ १७, १८ र २० मा टी–२० खेल हुनेछ। यूएइविरुद्धको सिरिज नेपालका लागि दोस्रो एकदिवसीय अन्तर्राष्ट्रिय सिरिज हुनेछ। आइसीसीबाट एकदिवसीय मान्यता पाएपछि नेपालले नेदरल्याण्डसँग पहिलो एकदिवसीय सिरिज खेलेको थियो जुन सिरिज एक–एकको बराबरी सकिएको थियो।

नेपाली टोलीमा पारस खड्का (कप्तान), ज्ञानेन्द्र मल्ल, सन्दीप लामिछाने, बसन्त रेग्मी, दीपेन्द्रसिंह ऐरी, करण केसी, ललितनारायण राजवंशी,आरिफ शेख,रोहितकुमार पौडेल, प्रदीप ऐरी, सोमपाल कामी, विनोद भण्डारी, भीम सार्की, अविनाश बोहरा, पवन सर्राफ र सन्दीप जोरा रहेका छन् ।