काठमाडौं– आज प्रकाशित अन्नपूर्ण पोस्ट दैनिकमा सत्तारुढ नेपाल कम्युनिस्ट पार्टीमा कार्यदिशा विवाद चर्किएको समाचार पहिलो पृष्ठमा प्रकाशन भएको छ ।

समाचारमा जनाइए अनुसार कार्यदिशा जनताको जनवाद कि जनताको बहुदलीय जनवाद भन्ने विवाद देखिएको छ ।

पार्टी एकताको एक वर्षसम्म दस्तावेजदेखि कार्यदिशासम्ममा चुपचाप बसेर संगठनात्मक एकतामा माथापच्ची गरिरहेका नेता अहिले कार्यदिशामा मतभेद पोख्न थालेका छन् । कार्यदिशा विवादककै कारण पछिल्लो पटक पार्टीका जोर पाइलट अध्यक्ष केपी ओली र पुष्पकमल दाहालकै बीचमा अविश्वास सिर्जना भएको छ ।

अध्यक्ष ओली पक्ष तत्कालीन एमालेले अवलम्बन गर्दै आइरहेको जनताको बहुदलीय जनवादलाई पार्टी कार्यदिशा बनाउनुपर्ने लबिङमा छ भने दाहाल पक्ष एकताका क्रममा तय गरिएको संक्रमणकालीन कार्यदिशा जनताको जनवादको पक्षमा छ ।

१३ महिनासम्म अन्तरिक राजनीतिक दस्तावेज छापेर कार्यकर्ताबीच पु¥याउन नसकेपछि नेकपाभित्र कार्यदिशाको विवाद सतहमा आएको हो ।