काठमाडौं – युएईको एक विमानमा चढ्ने नेपाली तथा विदेशी यात्रुले ‍चलचित्र ‘हरि’ हेर्न पाउने भएका छन् । विश्वभर विभिन्न एअरलाइन्समा यात्रुलाई विदेशी सिनेमा देखाइने गर्छन् । नेपाली सिनेमा भने खासै देखाइने गरेको पाइँदैन । यद्यपि दुबई जाने यात्रुका लागि भने यो सिनेमा देखाइने भएको छ ।

नेपालफिल्क्सले युएईको एक एअरलाइन्ससँग नेपाली चलचित्र प्रदर्शनका लागि सम्झौता गरेको हो । तर एअरलाइन्स कुन भन्ने खुलाएको छैन । पहिलो चलचित्रका रुपमा सिनेमा ‘हरि’ देखाइनेछ ।

काठमाडौं र अन्य देशका विमानस्थलमा विमान चढ्ने यात्रुले यो फिल्म हेर्न पाउने नेपालफिल्क्सका कन्ट्री म्यानेजर सार्थक जिसीले बताए । उनका अनुसार सन् २०१९ को मे महिनाबाट यो फिल्म प्रदर्शन गरिनेछ ।

यो कार्यले नेपाली सिनेमाको प्रचार अन्य देशमा पुग्न टेवा पुग्ने आशा गरिएको छ ।